Manubag ang Rehimeng US-Aquinosa mga Krimen Batok sa Katawhan!

Lima ka Tuig! Lima ka tuig nga ginudnod sa gobyerno ni Presidente Noynoy Aquino ang katawhang Pilipinhon sa mga kahiagoman nga dulot sa nagtunhay nga semi-kolonyal ug semi-pyudal nga kahimtang sa nasud. Adlaw-adlawng gisagubang sa katawhan ang kawad-on, korapsyon, paglapas sa tawhanong katungod, ug uban pang mga kaalaotan.  Ug ang labing nabug-atan  mao ang mga kabus, labina ang  mga Lumad nga katawhan sa kabanikanhan dinhi sa Mindanao.

Higanteng Korapsyon.  Gipasiatab kanunay ni Presidente Noynoy  ang “matuwid na daan” aron daw masumpo ang korapsyon. Apan unsay nahitabo?  Samtang gipasanginlan niyang nangawkaw sa bahandi sa nasud ang pipila ka karibal niya sa pulitika, siya mismo naghakop  og dili-maihap nga salapi — mokabat sa kapid-an ka trilyon ka pesos — nga gitipigan sa ngalang DAP o Disbursement Acceleration Program. Pork Barrel kini nga siya lang ang magbuot-buot kon unsaon niya paggasto! Gihinabang ba ni sa mga biktima sa kalamidad? Wala! Nagpaka-aron-ingnong ‘honest’, dako diay kaayong kawatan!

Ampaw nga Panghambog og Kalamboan.  Ang giingong economic growth o paglambo sa ekonomiya usa ka ampaw o walay unod nga hambog.  Ang PPP o  Public-Private Partnership usa ka dakong sagpa nga nagdalag insulto sa salabutan sa katawhan. Ang mga pribadong kompanya nga ganansiya ray gi-apas mao ray nakabenepisyo.  Nasugamak sa kalisod ang masa.sa pagbaguod sa dugang singil sa balayranan sa serbisyo nga unta ang gobyerno man ang dunay obligasyon. Wala kini kalahian sa gitawag og privatization sa nangaging administrasyon! Pastilan, gi-ilisan lag ngalan ang mao ra gihapong ungo nga hinungdan sa kalisdanan. Hinoon grabe kabangis kining ungoa karon!  Tiaw mo—kon magkina-unsa ang dagan sa pribadong kompanya, magkautang-utang ba kaha o ma bangkrap, ang gobyerno maoy mosagubang pagbayad, kay giprotektahan sila anang gitawag og sovereign guaranty!  Daghan gyud kaayong lipat-lipat kining sistema ni Noynoy!

Ang programang Conditional Cash Transfer (CCT) nga mas nailhan nga 4Ps ug para daw  sa pagwagtang sa kawad-on! Samot nang palpak! Nag-usik-usik lang sa bilyon-bilyong salapi nga gipanghatag isip “dole-outs” sa napiliang mga pobre! Dili man kini malahutayon intawon! Nagmugna lang hinoon og laing problema—makapaugmad og kinaiya nga magsalig og limos! Unta gigamit ang maong salapi pagtukod og mga industriya nga di lang kay makalalang og trabaho, makamugna pag  mga produkto.

Kontraktwalisasyon ug Ubos nga Suholan.  Kulang og trabaho ang katawhan, ug kun makatrabaho man, ubos pud kaayo ang suholan.  Gipahamtangan pa gyud  anang sistemang kontraktwalisasyon!  Ginatakda sa kontrata nga ang panarbaho  kutob ra sa pila ka bulan ug dili gyud makaabot og unom ka bulan, dayon taktakon na siya. Dili gyud mahimong regular nga trabahante. Ug kun mabutang-butangan pag sala, masayo-sayo ang pagtaktak niya sa trabaho.  

Dayag na lang nga dili makatukod og unyon ang mga mamumuo kay dili man sila regular workers!  Ways gyud sa pangwarta ang kapitalista!  Mga  kapitalista  ra gyuy gipangga ni Noynoy!  Ug manghambog pa nga kontento daw ang mga mamumuo sa palakaw sa panrabaho kay walay nag-strike!  Nagkasamad-samad na ka, ginudnoran pa’g asin ug suka imong samad! Sobra na!

Taas nga Presyo sa Palaliton. Dugang pang pahamtang nga kahiagoman mao ang sigeng paglupad sa presyo sa palaliton ngadto sa kapanganuran. Maayog pak-an ang masa!  Ang mga adunahan ra may dunay pako nga makagukod sa nanglupad nga mga presyo! Ang mga way trabaho ug ang mugbo kaayog sweldo dili gani makalukso, maunlod hinoon sa lapok sa tumang kalisod!   Busa, midangop na lang ang uban sa pagkapit sa patalim!  Dili katingad-an nganong midagsang ang kriminalidad: pangawat, pang-hold-up, baligyag droga, panulis, prostitusyon, ug uban pa! 

Pag-abandona sa “Social Services”.  Kining sistemang PPP sa ekonomiya maoy usa ka pag-abandona sa gobyerno sa responsibilidad niini nga maoy motagana og “social services” sama sa panglawas, edukasyon, pabalay, ug uban pa.  Gibalhin ni Noynoy ang tulubagon ngadto sa mga pribadong korporasyon.  Ang gisangputan nagkagidlay ang masa nga dili na makasugakod sa pagtaas sa bayranan sa pa-ospital, sa pagtaas sa matrikula ug tuition, pag-arkilag balay puy-anan, ug pagbayad sa kuryente’g tubig.  Ang industriya sa lana (krudo ug gasolina) labihang nakapalisod sa katawhan! Mitaas ang plitehan! Ug nagkaaberiya pa ang mga tren nga maoy gisaligan sa masa!  Kini untang maong mga serbisyo itaganang libre  sa gobyerno  kundili man sa ubos kaayong bayranan.  Apan klaro kaayong maoy gihatagag pribilehiyo ang mga kapitalista.  Ug miting-ab sa kapait ang masa!

Paglapas sa Kaugalingnan o Soberanya. Dakong binuang ang gihimo sa Imperyalistang Tsina nga nangangkon sa mga islang nahasakop sa economic zone sa Pilipinas.  Angay lang ug makatarunganon nga gikondena ug atong gisinggitan—Pahawa sa among Scarborough Shoals! Dugay rang gisultihan sa mga progresibong hut-ong nga isumbong kining maong salaod sa  Tsina sa International Tribunal on Law of the Seas.  Nagluyaluya ang gobyerno ni Noynoy!   Maayo na lang nga tuna na, gibista na!  Ug nanghinaot ta nga paborable ang  mahimong desisyon sa maong tribunal.

Ang Visiting Forces Agreement (VFA) ug ang Enhanced Defense Cooperation Agreement (EDCA).

Apan bisan sa wala pa kining problema sa imperyalistang Tsina, daan nang dunay dakong problema sa soberanya ang atong nasod.  Kini mao ang VFA ug EDCA—duha ka kasabotan tali sa Pilipinas ug Amerika nga pulos malinglahon kaayo ug dili patas.  Nagpatonto si Noynoy sa hopus-pokus sa US nga nagpatuso-tusong motabang og  depensa batok sa bisan kinsang langyaw nga buot mosakop o molapas sa atong soberanya.

Matinud-anon nga papet  si Noynoy!  Kinasing-kasing ang pagtanyag niyag katungod sa Imperyalistang Amerika nga mo-base sa iyang mga tropa dinhi sa atong kayutaan bisan og klaro kini nga usa ka paglapas sa atong soberanya. Mi-alma siya sa pangbusabos sa imperyalistang Tsina, pero misalig siya sa tam-isong bolada sa Amerika! Giwakli niya sa usa kamot ang Tsina, apan gitunol niya ang pikas kamot sa Imperyalistang Amerika! Unsang klasehang pagbarog sa kaugalingnan o soberanya?  Kining duha ka imperyalistang nasod nagkompetensiya lang sa pagdominar sa tibuok kalibotan para sa ilang hinakog nga mga interes! Wala tay angay dapigan sa duha!  Mga Imperyalista gud na! 

Grabe gyud kaayo ang pagpatuta ni Noynoy sa Imperyalistang Amerika!  Gipalagpot na kadtong mga US Military Bases sa “Magnificent 12” sa Senado niadtong panahon ni Cory Aquino!  Unya karon, gipabalik ni Noynoy!  Kaniadto, Subic ug Clark lang ang giyak-an sa mga base militar sa US.  Karon bisan asang dapit sa atong teritoryo pwedeng mag-base ang mga tropang Amerikano. kun kanus-a nila gusto.

Ug wala pa makontento niana, gidasig pa ni Noynoy ang Japan nga mobutang og mga base militar dinhi sa atong kayutaan aron kaha ma-isolate gayod ang Tsina ug modapig ang ubang kanasuran sa atong kawsa! Gusto ra pud kaayo ang Japan nga manggilabot sa suliran sa Pilipinas! Nah, nakalimot na ba ta sa ngilngig nga mga sala sa mga sundalong Hapones sama sa sistematikong pag-reyp sa kababaihan?

Pagyatak sa Tawhanong Katungod.  Wala nay molabaw pagka walay konsensiya ug kaluoy sa mga katawhang mayukmok kaysa gobyerno ni  Noynoy. Tungod sa pagpabor  niini sa dagkong langyawng kompanya sa mina gitugotan kining mag-operate sa kayutaan nga yutang kabilin (ancestral lands) sa mga katawhang Lumad.  Ug ang armadong kusog sa nasud (AFP) maoy gigamit paggwardiya sa mga interes niini, hinungdan nga kun asa tong mga dagkong minahan, tua sab nagpunsisok ang mga pwersa militar sa gobyerno.  Dinhi nanghitabo ang dinaghang mga paglapas sa tawhanong katungod sa mga Lumad nga misupak sa dagkong pagmina nga nasaksihan nilang misangpot sa pagpasipala sa ilang yutang kabilin ug sa kinaiyahan.  

 Ang mga Krimen sa Oplan Bayanihan.   Kunohay ang pwersa military sa AFP naglunsad og programang peace and development sa kabanikanhan—ang Oplan Bayanihan. Apan dili  kalinaw ug kaugmaran ang katuyoan niini, kundili counter-insurgency o paggukod sa mga rebeldeng NPA.  Misulod sila ug mi-okupar ug mipuyo sa mga panimalay, barangay hall ug eskwelahan sa mga tribuhanong komunidad. Wala nila respetoha ang Rules of Engagement sa Geneva Convention, ug gilapas ang kasabotang CARHRIHL tali sa Gobyerno sa Pilipinas ug sa National Democratic Front (NDF). Kining maong kasabotan naumol niadto pang panahon ni Presidente Estrada ug naglagda sa angayng paglihok ug gawi sa mga nagkaatbang nga mga armadong puwersa (combatants).  Ang CARHRIHL (Comprehensive Agreement on Respect for Human Rights and International Humanitarian Law)  gitamod ug gituman kanunay sa rebeldeng grupong NPA.  Apan imbis tumanon sa AFP gihimo nini ang labing mangilngig nga pagyatak sa tawhanong katungod nga nasinati sa mga sibilyang Lumad—panghasi, panghadlok, pagpangidnap, pangtortyur, pangmasaker, pang-reyp ug uban pang katarantadohan gihimo sa mga sundalo sa gobyerno. 

Militarisasyon ug Pagpamakwit.  Tungod sa grabeng militarisasyon nga maoy hinungdan sa mga pang-abusong gihimo sa mga sundalo sa kabanikanhan, daghang mga pagpamakwit ang nanghitabo sulod sa lima ka tuig nga pagpamuno ni Presidente Noynoy Aquino.   Karong mga taknaa mismo, ania pa sa Syudad sa Davao ang liboan ka mga Lumad gikan sa Talaingod, Kapalong ug Bukidnon.  Nanglayas sila ug  midangop sa Syudad sa Davao gumikan sa dili maantos nga kalisang ug kalisdanang dulot sa militarisasyon sa ilang mga lugar.

Ug niadtong miaging mga semana, pipila ka mga lider ug tigpamaba sa katawhang Lumad ug uban pang hut-ong ug sektor  nga nakatagamtam sa mga paglapas sa ilang tawhanong katungod,  atua didto sa Washington DC sa Amerika aron ipadungog sa People’s Tribunal on International Human Rights ang mga kasayuran ug mga kaso batok sa mga kalapasan sa human rights sa masa ubos sa gobyerno ni Noynoy. 

Ang Tubag ug Hukom sa Katawhan:

Ipakita ta ang labing baga ug labing halapad nga pwersa sa katawhan sa pagprotesta sa  iyang pamakak ug panglingla sa iyang pagahimoong SONA karong Hulyo 27 didto sa Kongreso!

Awhagon ta ang tibuok katawhan sa Mindanao nga maghiusa sa paghimaraot sa gobyerno ni Noynoy ug tulisokon ta siya nga manubag sa iyang mga krimen batok sa katawhan!

Hunungon na ni Noynoy ang iyang pagpatuta sa Imperyalistang Langyaw ug ibasura ang mga kasabotang VFA ug EDCA ug uban pang dili-patas nga kasabotan o treaty  nga nagpahamtang lang sa atong nasod sa kuyaw ug kulba nga pagkahiagom sa posibleng kusganong komprontasyon tali sa Amerka ug Tsina.

Undangon na sa Imperyalistang Amerika ug Imperyalistang Tsina ang pagdalahig sa atong nasud ug katawhan sa ilang panag-ilogay og “spheres of influence” dinhi sa Habagatang Asya ug Pasipiko!  Ug respetohon nila ang kaugalingnan sa Pilipinas!

Hukman ta si Noynoy nga ibalhog sa bilanggoan isip silot sa iyang mga krimen!

Mabuhay ang tanang masa sa katawhang Pilipino nga nakigbisog batuk  sa  papet, pasista ug korap nga gobyerno ni Presidente Benigno S Aquino III!

Mabuhay ang tanang  katawhang Pilipino nga nakigbisog batuk sa dunot nga semi-kolonyal ug semipyudal nga sistemang gipatunhay sa reaksyunaryong rehimeng US-Aquino!

Mabuhay ang Nasudnong Demokratikong Pakigbisog sa Katawhan!

Pamahayag sa Bagong Alyansang Makabayan-SMR  | Davao City, Hulyo 27, 2015