BRAWN-AWT: MAKALAGOT, MAKAPUNGOT!

BRAWN-AWTTTT…… hahay makalagot!!!

Perwisyo alang sa tanang katawhan ug apektado ang dagan sa komersiyo ug serbisyo. Matud pa sa asosasyon sa mga investor, milyones ka pesos ang mawala matag oras tungod sa taas nga oras nga brawn-awt nga atong nasinati karon.  

Matud pa sa gobyerno ug sa mga dagkung negosyante sa kuryente sama sa mga Aboitiz, nagkulang na kuno ang suplay sa atong enerhiya tungod kay ting-init ang panahon karon. Nikunhod kuno ang level sa tubig sa mga hydropower plants sama sa Agus-pulangi ug Maria Cristina nga mingresulta sa pagkunhod usab sa  kuryenteng mapalugwa sa maong mga planta.  Husto ba kini nga mga pasangil? Murag ang dagan sa istorya, ang kinaiyahan pa ang nahimong sad-an. Sala ba diay sa kinaiyahan kon wala tarunga sa pagdala sa gobyerno ang agus-pulangi hydropower plant nga ningresulta sa dili maksimisadong pagpalugwa og kuryente.  Sala ba diay sa kinaiyahan kon ang pundo sa Malampaya nga proyekto sa gobyerno alang sa enerhiya gikurakot sa mga opisyales sa gobyerno, imbis nga idugang ang maong  pundo aron makapalapad ang gobyerno sa mga proyektong pang-enerhiya.  

Makalibog ang baruganan atong sa gobyerno. Kon suplay man sa kuryente ang suliran, ang pagsapribado ba sa industriya sa enerhiya ang kasulbaran?  Husto ba nga itugyan ngadto sa mga kapitalista ang industriya sa enerhiya, isip usa ka batakang panginahanglan.  Husto ba nga ang  enerhiya nga giilang lifeblood sa atong eknomiya, himoong negosyo, imbis  nga serbisyo?  Husto ba nga itugyan sa mga kapitalista, diin walay laing katuyuan ang paghakop lamang og dakung ganansiya taliwala sa kalautan sa katawhan.

Tan-awa karon. Nagsige nag brawn-awt, ningtaas pa hinuon ang atong bayronon sa kuryente.  Pangatarungan sa Aboitiz kay tungod  kuno ningkunhod ang gisuplay nga kuryente sa NAPOCOR nga diin barato ug ninggamit sila diesel-fueled genset  nga mas mahal kumpara sa hydropower, aron ihulip sa kakulangan sa NAPOCOR.  Lisud gyud sabton sa katawhan, nga sige nag brawn-out, nitaas na man hinuon ang ilang bayronon. Mao kini ang ginadangatan sa katawhan sa dihang gisapribado na ang indusriya sa kuryente. Niadto, kutob lang distribution sa kuryente ang negosyo sa Aboitiz, apan karon hangtud na kini sa power generation.  Imbis na palapdon ug pakusgon ang NAPOCOR, isip proyekto sa gobyerno nga mualagad sa katawhan, gibaligya na man hinuon sa gobyerno ang maong korporasyon ngadto sa mga kapitalista. Samtang ang katawhan nag-antus sa brawn-awt, nabulahan gihapon pag-ayo ang Aboitiz  pinaagi sa paghakop og dakung ganansiya.

Halos 55 porsyento sa suplay sa kuryente sa Mindanao naggikan sa Agus-Pulangi hydropower plants complex nga natukod sa Agus River sa duha ka probinsya sa Lanao ug Pulangi River sa Maramag, Bukidnon. Ang installed capacity o kapasidad nga mumugna og kuryente sa maong mga planta mukabat sa 900 mega-watts (MW) ug dependable capacity niini o ang kapasidad mga muhatag og kuryente mukabat sa 700 MW. Apan tungod sa siltation ug kakulang sa maintenance sa maong mga planta gumikan sa pagpasagad ug kawalay igong badyet sa rehabilitasyon ug maintenance sa gobyerno, miubos ang kapasidad niini sa paghatag og kuryente ngadto sa 500 MW.

Tungod sa Agus-Pulangi Hydropower Plants Complex (APHPC), nagpabiling ‘ubos’ ang singil sa kuryente sa Mindanao kumpara sa Luzon ug Visayas. Ang average nga generation charge sa Luzon mukabat sa P4.36/kWh ug Visayas P3.72/kWh samtang sa Mindanao mukabat lamang sa P2.81/kWh.

Ilalom sa EPIRA nga nahimong balaod kaniadtong Hunyo 2001, adunay probisyon nga nagdumili (deferment) sa pagbaligya sa pribadong korporasyon o pribatisasyon sa Agus-Pulangi Hydropower Plants Complex (APHPC) sulod sa 10 ka tuig. Kay tungod gunit pa kini sa gobyerno, nagpabiling ‘ubos’ ang singil sa Mindanao kumpara sa Luzon ug Visayas.

SERBISYO UG DILI NEGOSYO ANG ANGAY NGA MAG-UNANG KINAIYA SA INDUSTRIYA SA ENERHIYA.

Angayang magpakabana kitang mga katawhan tungod kay tataw nga gibinuangan kita sa gobyernong Aquino ug sa mga kapitalista. Angayang singlon ang gobyerno dinha sa iyahang responsilibidad sa paghatag sa katawhan og kuryente isip serbisyo ug dili dakong negosyo. Angayang ipanawagan sa gobyerno nga maggahin ug dakong pundo alang sa rehabilitasyon sa APHPC imbes nga ibaligya kini sa mga kapitalista. Kung tinuod nga adunay kasing-kasing ang gobyerno alang kanatong katawhan, angayan nga ibasura ang balaod nga EPIRA ug  inasyunalisa sa gobyerno ang industriya sa kuryente imbis nga ihatag kini sa kamot sa mga dagkong kapitalista nga walay laing interes kundili ang pagkawkaw ug dagkong ganansya. Hangtud dili magpakabana ang gobyerno alang sa kaayuhan sa mayorya sa katawhan, dako ang panginahanglan nga kita molihok ug musalmot sa mga kalihokang protesta batok sa pakigkunsabohay sa gobyernong Aquino ug sa mga dagkong kapitalista.

JUNK EPIRA! JUNK PPP!

REHABILITATE AGUS-PULANGI NOW!

NATIONALIZE POWER INDUSTRY!

NO TO MONOPOLY OF POWER INDUSTRY!